Адамзат қауымы - барлық тіршілік атаулының ең қатыгезі екені айдан анық. Заман талабы өзгерген сайын қоғамға төнер қауіп қаншалықты алапат болғанымен, соншалықты тіршілік иелерінің арасындағы тепе-теңдік ұсталып тұрары һақ. Жұмыр басты пенделер тіршіліктің қожасы емес, жаратылыстың бір бөлшегі. Сол жайттан хабар беретін Ш. Мұртазаның "Текебұрқақ" драмасы мың бір мәрте ойландыруға мүмкіндік береді. Аласапыран текетірестің бұрқасын күйін театр сахнасынан тамашалаңыздар!

Жанр: пластикалық морфоза

Режиссер: А. Салбанов

Сахна сайысын қоюшы: Ж. Ахан

Композитор: С. Айтқалиев

Балетмейстер: П. Әбдірахман

Жарық беруші: Г. Садықова

Режиссердің көмекшісі: Г. Ислямғалиева

Махаббат – мәңгілік тақырып. Ұлттың қатал салт-дәстүрі мен тәртібі бір-бірін сүйген екі жасты айырып, үшінші адамды өкінішке қалдырып, қайғылы тағдырға әкеп соғары Һақ. Ессіз ғашық болған ақын жанның сүйіктісіне деген сезімін мәңгілік ету үшін жасар әрекет қандай?

Бір-біріне өлердей ғашық Қарагөз сұлу мен ақын Сырымның тағдыр тауқыметі мен мінезі қатал, бір елдің билеп-төстеушісі, қара емендей айтқанынан қайтпайтын Мөржан әженің қарсылығы соңында неге апарып соқпақ? Ғашығынан айрылған Наршаның қасіретін сөзбен айтып жеткізу мүмкін емес.

Спектакльден махаббатты қара сөзбен жырлаған, ерте заманғы ескілікті көзқарастан туатын адамдар арасындағы шым – шытырлық оқиғаларды көреміз.

Жанр: Трагедия

Қоюшы-режиссер: Г. Балпейісова (Ресей)

Қоюшы-суретші: Қ. Мақсұтов.

Киім суретшісі: И. Осколков (Ресей)

Жарық суретшісі: Н. Туманян (Ресей)

Композитор: О. Синкин (Ресей)

Балетмейстер: Э. Иманғазина (Ресей)

Қазақтың азаматтық тарихындағы ең ұлы идея - Алаш идеясы! Ұлттық Тәуелсіздікті мұрат тұтып, ұлы істер атқарған Алаш арыстары самодержавиялық қуатты империяның бұғауынан шығу үшін өркениетке лайық саяси күрес жүргізді. Алаш партиясын құрып, Алаш Орда үкіметін жасақтады. Ұлттық-териториялық Алаш автономиясын жария етті. Бірақ азамат соғысында жеңіске жеткен Кеңес үкіметі Алаш партиясы мен Алаш Орданы Қазақстанның қоғамдық-саяси өмірінен аластатып, күшпен таратты.

Жиырмасыншы ғасыр басындағы осы бір күрделі кезеңдерден сыр шертетін Қ.Жүнісовтің «Ұлтқа қызмет» деректі-көркем драмасы, Тәуелсіздіктің 30 жылдығына орай сахналанды. Ә.Бөкейханов бастаған қайраткерлердің азаттық жолындағы арпалысы, ауыр тағдыры суреттелетін спектакль тарихи оқиғалар негізінде жазылған. Ұлттық рухымызды күшейтіп, ұрпақты отан сүйгіштікке тәрбиелейтін туынды, ерлік пен елдікті танытады. Шиеленіскен оқиғалар режиссерлық тың шешімдер арқылы шарықтау шегіне жетеді. Ұлт-азаттық қозғалысы көсемдерінің азаматтық тұлғасы актерлық шеберлік арқылы көрерменге жол тартады. Бұл Алаш тақырыбын кең ауқымда қамтыған тұңғыш қойылым. Арыстар рухына бас иіп, театр сахнасынан тұлғалар жайлы спектакль тамашалаңыздар!

Жанр: деректі-көркем драма

Қоюшы-режиссері: А. Салбанов

Қоюшы-суретші: Қ. Мақсұтов

Әуенмен әрлеуші: Қ. Болатов

Балетмейстер: П. Абдрахман

Жарық беруші: Г. Садықова

Режиссердің көмекшісі: Г. Ислямгалиева

Қырғыз халқын күллі әлемге танытқан, адамзаттың Айтматовы атанған Шыңғыс Айтматовтың қалам тербеуге негіз болған махаббат тақырыбы әрқашан да өміршең. Ойда-жоқта кездесуден басталған таныстық үлкен махаббатқа ұласады. Шың басындағы шынарға ұқсатқан, ақ жүрегінің құрбаны болуға даяр Әселінен Ілиясты алыстатқан нендей сиқыр, нендей құдірет? Қойылымда сезім мен намыс сынға түсіп, «бастарына бейуақ бақытсыздық орнаған» жандардың өмірі баяндалады. Өмірде бір ғана жасалған ағаттықтың бағасы қандай болмақ? Әсел Нуриденнің сиқырын қайтарған Шолпандай бола ала ма? Сүйіспеншілік, адалдық, сыйластық, достық, көре алмаушылық, жауапкершілік, қамқорлық сынды тақырыптар қозғалатын лирикалық драмада нәзік сезім, ішкі мұң жатыр. Спектакль өмірдегі ұмытылмас, жүректің түкпірінде терең сақталған қимас махаббатты әспеттейді.

Жанр: лирикалық драма

Қоюшы-режиссері: Т. Теменов

Режиссердің ассистенті: Б. Киекбаев

Қоюшы-суретші: Ш. Елембаева

Балетмейстер: Д. Жақыпбаева

Әуенмен әрлеуші: Д. Қанаева

Жарық беруші: Г. Садықова

Режиссердің көмекшісі: Д. Қанаева, Г. Ислямғалиева